*الحبيب محمد عبدالماجد استنكر في زاويته المحبوبة قصة برلمة مجلس الهلال
*استنكر ذلك لدرجة أنسته ثوريته ومعاها مدح كمان
*يقول محمد عبدالماجد في وصفه للسوباط والعليقي
*ناس البترول ديل ما عندهم جودية
*اكسح وأمسح وافسخ بس
*حتى عبارة المدح هي إحدى شعارات أحمد هارون
*من أول وهلة ما صدقت إنو الكلام القدامي ده كتبو محمد الثورجي
*قلت يمكن كلام زول شوربجي (بتاع شوربة)
*فسلوك الثورة وقناعاتها لا يمكن أن تسمح لثورجي أن يمتدح ثورة مضادة أو مضاد حيوي
*ناس البترول ديل يا حمودي خلي طابقهم مستور وخليهم في بترولهم (إذا حقهم) أو إذا (حق غيرهم واسمي مكتوب)
*نرجع لموضوعنا
*السوباط برلمتو مافيها شك
*من بترولو ولرئاسة نادي الهلال
*لا خبرة ولا أظنو كان وقتها يعلم الهلال فيها كم لام
*وكتاااار الزيو في مجلس الهلال
*وللأمانة كتااار زيو على قمة الهرم الإداري الرياضي
*يعني برلوم وسط الجماعة عرس
*الحبيب محمد زعل من برلمة مجلس الهلال
*طيب تعال جاي
*الهلال ذاتو برلوم المريخ لليوم
*النشأة
*السينير المريخ والهلال برلوم
*وفي النشأة دي
*الهلال برلوم بري ذاتها
*فبري إذا قابلت الهلال بتملصو لأنها هي سينير الشعار والهلال
*والهلال برلومها
*يعني في النشأة الهلال برلوم المريخ
*في الاستادات
*استادكم الخالعكم (اللهم اجعله في ميزان حسناتها وفك أسرها واستر سرها)
*استادكم ده برلوم استادنا
*شوف نحن شيدنا متين وإنتوا شيدتوا متين ونحن افتتحنا متين وإنتوا افتتحتوا بالدين متين؟
*برالمة استاديا برضو
*إفريقياً
*نحن قبل تلاتة وتلتين سنة اتخرجنا
*فارقنا مدرسة الأندية غير الحائزة على بطولة من بطولات الكاف
*ودخلنا جامعة الأندية المتحكرة على لوح الشرف الأفريقي بفضل حيازتها لبطولة من بطولات الكاف
*وإنتوا لي أسي في الأساس زيرو كبير
*في دي برالمة إنتوا وسناير نحن ، ولا دي ما سمعوا بيها ناسك ناس (البترول )
*ياخ في دي
*كردنة عندو فيديو حايم
*فيديو أوسكار
*للرائع وليد أبو هجمة
*مونتاج من لقاء مع كردنة على شاشة البلد
*قال قناة الهلال قال
*كردنة فات
*وقفل الملفات
*والقناة رجعت لي سيدها
*ناس البترول ديل البترول شغلهم عن إطلاق قناة لنادي البترول ولا شنو؟؟؟
*كلموا الشيخة بتعملها ليكم
*ياخ مرة البر والإحسان دي عملت ليكم استاد بي فندقو ما تعمل ليكم قناة
*القناة طبعا حا تكون كلها اكسح امسح وإعلانات محطات بنزين
*وأغنياتها البابور جاز خلو الاشتغل لما لجنة التمكين تعود يا أبو حميد
*أوعه ناس البترول الما بفتشوا لي جودية
*يرجعوا يكوسوها يابسة
*ده تبقى مشكلة يا أبو حميد
*محمد عبدالماجد رجل ثوري ما بتغالطو في دي نفرين
*ولثوريته هذه احترامها عند الكثير من جماهير المريخ
*ومقدرنها ليهو
*بس كوصية
*إذا تعارضت الهلالية مع الثورة
*أخير ليك الثورة فهي أقرب للقلوب
*والوطن أولى ثم تأتي بقية الانتماءات
*المهم
*الفيديو بتاع كردنة العملو وليد أبو هجمة روعة
*كردنة قال اعترضت على الاحتفال بمرور تسعين سنة على تأسيس الهلال
*لأنو ما ممكن نادي تسعين سنة ما شال كأس ويحتفل
*نحتفل بي شنو؟
*طبعا كردنة لو لقى في دولاب الهلال مانديلا
*كان قفل واحتفل وختاهو مع بشه في دائرة السنتر
*لكنه وجد العنكبوت الذي يدل على البرلمة
*ياخ سيكافات عندنا مجدعات زي الركشات
*وإنتوا يا محمد بي بترولكم الركشة تسمكم
*تقول لي ما برالمة
*برالمة وزيرو كبير كمان
*دفعة مريم بتي
*السنة دي ماشه زيرو كبير
*برلومة زي الهلال
*ما زي العجب
*العجب ده بلعب في نادي سينير
*أسي في أي محفل رياضي
*يحق ليكم في التعريف
*تقدمونا بقولكم
*المريخ
*سينيرنا
*صدقوني أفريقيا كده بتحترمكم
*لأنو سينيركم عضو في لوح الشرف الإفريقي
*ولكي تعم الفائدة
*نحن كسناير نشرح لبرلومنا معنى لوح الشرف الإفريقي لأنهم برالمة لا شافوه ولا اتكتبوا عليهو
*لوح الشرف الأفريقي ده يابرالمتنا
*لوح كبيييييير
*وعاااااالي
*بكتبوا فيهو بالدهب
*طبعا بالدهب ما بتكتب نادي ضهب
*بكتبوا فيهو الأندية السناير الشالت بطولة من بطولات الكاف
*الهلال برلومنا حقو ما يحرجنا ويسألنا أنا اسمي مكتوب؟؟؟
*طبعا ما مكتوب
*كردنة قال لقى الديار خلا
*كاس ما فيها
*بيت أنصار سنة بس
*ولا كاس
*وقع ليكم يابرالمة؟؟؟
*المهم
*كورسات تقوية لطلاب زيرو كبير
*الفرص محدودة
*سجل برلومك حتى لا تفوتك الفرصة
*وسجلنا برلومنا
*لا شكر على واجب يا محمد عبدالماجد
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*البرالمة دايرين يتطاولوا علينا
*وكردنة قال لما جينا
*الترابة ما لقينا
*خجلانين خجلانين خجلانينا
سلك كهربا
ننساك كيف والكلب قال عندي جريو كلما نجي جمب البرلوم مول يقول نادي الهلال نادي الهلال …ماعارف العلاقة شنو؟
وإلى لقاء.
