متابعة/الرؤية نيوز
زى مافي ناس بتدي نفسها الحق في الهجوم والتنمر والتهكم والسخرية والإساءة … أنا بدي نفسي الحق في الدعم المعنوي والتعاطي بإيجابية والتشجيع والمناصحة والرحمة وجبر الخواطر.
الشباب القابلوا السيد القائد أصحاب مبادرة (مانسيناكم) أنا بعرف معظمهم بشكل شخصي أو شكل عام…وسأشهد ببعض ما أعلم أمام الله.
مستر راشد أخ عزيزة وعشرة عمر… تابعت رحلة كفاحه…وعارفة حجم المسئوليات الفي رقبته…وإشتغلنا مع بعض عدد من المبادرات الخيرية والإجتماعية من سنيييين وفي صمت.
#أولاد_حيدر كفاية جداً محتواهم اللطيف الخالي من الإسفاف بمشاركة أمهم أسمهان البخت نفسي الان في مكانها وأستحضر روح الأم…ده غير مبادراتهم الكريمة ووقفاتهم الوطنية…والعمله (أحمد) براه لما المنتخب السوداني كان مشارك في تصفيات كأس العالم لاتنكره إلا الذاكرة السمكية الشريرة.
#التش الولد المهذب..اللطيف…جبار الخواطر … وعبره التحية لى (سولجا) ولو عايز تعرف عملوا شنو راجع اليوتيوب و (ما فارقة).
#مُلا ملك الإبتسامة والبديهة الحاضرة… إشتغل على روحه وطور نفسه وبيدعم المشاريع الصغيرة والشباب الناجح ودونكم صفحته…وإشتغلتا مع بعض شغل كبير لمركز #وعي والإسم كفاية.
#أولاد_الشيخ (إبراهيم ومحمد) ديل بقى تشهد ليهم تركيا والسعودية والخرطوم…إحترام وتهذيب وشطارة وأفكار ونجاح وأسرة ووضع وكللللله.
#مجتبى_رزق يعني مبادرة نظافة جامعة الخركوم ومبادرة الخرطوم خضراء وطاقة خير وإيجابية وحماس مدعومة بتميز أكاديمي والعايز يتأكد ممكن يزور الجامعة أو يتفقد شوارع الخرطوم.
الباقين قد تكون ما جمعتني بيهم الظروف بشكل مباشر…لكن واضح جداً إنهم شباب سودانيين أصحاب طاقات وعندهم الكتير للبلد.
شنو يعني لو السيد القائد قابلهم؟!…شنو لو إحتويناهم ووظفناهم لصالح الإعمار والعودة والتوعية والإنجاز؟!…حتنكروا تأثيرهم؟! لو ناكرنه راجعوا عدد الحضور في الإستاد لأول فعالية أعلنوا عنها !!…ثم هل فيكم زول منزه ومعصوم وملاك نازل من السماء؟!…ليه تكسير المجاديف والإنتقاد الحاد لو بالإمكان يكون في نقد بناء وتوجيه سليم ؟!!… وإنتوا منو ذاتكم البتمشوا تنكتوا البوستات وتتنمروا على الصور؟!… ياما ناس غير قناعاتها ومواقفها وعادت لسبل الرشاد!! وياما ناس كتبت في ظروف معينة تحت تأثير معين… طوااالي بقيتوا القاضي والجلاد؟!!
نفسي أعرف بنستفيد شنو من الكلام الشين والتجريح ؟!!…ثم البرهان لاقاهم وإنتهينا وفق ترتيب مسبق من رجال المكتب والمراسم وفق رؤية بيعرفوها هم….أنتوا زعلانين ومعترضين بعد شنو؟!! …هسه لو زول فيكم قالوا ليه تعال قابل الرئيس يسمع منك وتسمع منه حيكون ردة فعله شنو؟!! وليه ما سألتوا عن تفاصيل النقاش والاراء والأفكار المطروحة؟…ولا بيهمكم الإنصرافية؟!
عموماً أنا كداليا بحيي الشباب ديل وبدعمهم وبدعي ليهم….وبتمنى السيد القائد يقابل نماذج من كل الفئات وينفتح على المجتمع أكتر وأكتر.
الشهداء مابيتقارنوا…. ولاقدموا أرواحهم فداء للوطن عشان يجي زول غير سوى ومنحرف نفسياً يستخدمهم كحجة تنكيل وإنتقاص من قدر الغير… ولا وكلوكم للمعايرة والتمييز !!
وأتمنى من الشباب ديل يعرفوا أنهم من يوم الليلة أمام مسئولية كبيرة … ولو كانوا زمان بيتعاملوا مع الميدية بإستهتار وطيش يجتهدوا في تغيير النمط والرسالة… عشان بعض الناس الكنتوا تعبانين وبتحاولوا تضحكوهم وتهظروا معاهم وتقدموا ليهم محتويات خفيفة تناسب أهواءهم ما عاجبهم عملكم الرسالي ودايرنكم للفارغة بحسب فهمهم القاصر…وإنتوا من الليلة بقيتوا ناس مليانة .
وكان على الإساءة والتنمر… مردود لى سيده… وربنا موجود في كرسي العدالة….وكله محفوظ في اللوح ….لابينقص عمركم لا بيقطع رزقكم… كلام والسلام….وحده وراء الكي بوردات دي… كلهم بيلاقوكم في الشارع يتصوروا معاكم والله.
أنا بالنسبة ليكم أم…. ومابقبل عليكم الشينة… وبتمنى تحصل معجزة ترجع المجتمع السوداني للفضيلة والتقوى ومخافة الله في عبادة.
